"Henry par la grâce de Dieu roy de France et de Polongne, à tous présens et a venir salut, savoir faisons avoir reçu l'humble supplication de nos chers et bien aimez, les manans et habitans du bourg de Connerray au pays du mayne, contenant que ledict bourg est aucun passaige fréquenté de marchans, tant d'estrange pays, que nos subjectz scitué sur la rivière d'Huygne et du Dué et assis sur les grands chemins traversans les provinces de Bretagne, Anjou, Poitou, Touraine, le Mayne et aultres pays de cestuy nostre royaume pour venir à Paris, habité de bons et notables bourgeois, au moyen de quoi y passent, repassent et affluent ordinairement plusieurs personnes principallement en temps de guerre qui est cause que lesdits fréquents passaiges de plusieurs avantcoureurs, vagabondz et aultres gens vivant à discrétion contre toute raison et équité, tout ce que lesdicts suppliants peuvent amasser de leur travail et labourage leur est en ung instant, tant de jour que de nuit derrobé, osté pillé et pry. Nous ayant ceste occasion lesdits suppliants, très humblement fait supplier requérir pour obier ausdicts pilleries, ravissements, leur voulons permettre faire clorre lesdit bourg de Connerray de murailles, tours, portes, poternes, pontz-levyz, fossez et aultres choses nécessaires à clotures, fortiffications de ville, et pour ce faire, imposer et lever sur eulx telle somme de deniers qu'il nous plairoirs ordonné et sur ce leur octroyer nos lettres en tel cas nécessaires. A ces causes, après avoir faict voir en notre conseil la requete à nous présentée par lesdits habitans, leurs avons pour ces considérations et aultres à ce nous mouvans de notre certaine science, grâce spéciale, pleine puissance et autorité royale, permie et permettons par cette présente qu'ils puissent et leur soit loisible de faire clorre ledict bourg de Connerray de murailles, tours, poternes, pontz-levyz, fossez et aultres choses nécessaires à la fortiffication, et en icelle pouvoir avoir et tenir toutes sortes d'armes pour leur tuition et deffense. Pour faire laquelle closture et fortiffication, avons aussi permie et permettons ausdicts habitans imposer et lever sur eulx et sur tous ceulx qui ont ou aurons maisons et héritaige au dedans du pourpris dudict bourg, le fort portant le faible, le plus justement et égallement que faire ce pourra jusqu'à la somme de mil escuz sol et à la somme de trente escuz pour les frais, poursuijtte et expédition des présentes en trois années prochaines et consécutives, à commencer au premier jour de janvier prochainement venant que l'on comptera mil cinq cens soixante dix neuf, au payement desquelles sommes, voulons les cottisez, estre contraintz, nonobstant oppositions ou appellation quelsconques comme il est accoustumé faire pour nos deniers et affaires, pourvus touteffois que lesdicts habitans ou la plus grande partie d'iceulx s'y soient consentys ou conssentent et que nos deniers ne soient aucunement retardez. Lesquelles sommes cy-dessus voulons estre receues par l'ung des habitans dudict Connerray, suffisant et solvable, ainsi qu'ilz adviseront pour le mieux, lequel sera tenu les distribuer à mesure qu'on travaillera à ladict closture, et d'en rendre compte autres habitans toutes fois et quantes que besoin sera. Permettant au surplus ausdicts supplians pouvoir prendre des terres, prez et vignes et aultres heritaiges nécessaires à l'encloz et enceinct de ladicte ville, en récompensant raisonnablement les propriétaires desdicts héritaiges, s'il y eschet. Si donnons en mandement au sénéchal du Mayne ou son lieutenant, esleuz dudict lieu, et à tous nos aultres justiciers et officiers qu'il appartiendra, que du contenu en ces présentes nos lettres de permission, vouloir et intention, ilz facent, souffrent lesdicts, ensemble leurs hoirs, successeurs et ayant cause, jouyr et user plainement et paisiblement, sans leur faire, mettre ou donner, ne souffrir leur estre faict, mis ou donné, ores n'y pour l'advenir aucun trouble et empeschement, au contraire, lequel, si faict, mis ou donné leur estoit, ilz le mettent ou facent mettre incontinant et sans délay en pleine délivrance. Car tel est nostre plaisir, nonobstant quelsconques lettres impérées ou à impétrer à ce contraires. Et afin que ce soit chose ferme et stable à tousjours, nous avons faict mettre nostre scel à ces dictes présentes, sauf entre aultres choses, nostre droict, et l'aultruy en toutes. Donné à Paris au mois d'Aoust, l'an de grace mil cinq cens soixante dix huict, et de nostre règne le cinquièsme.Par le roy, Me le Conte des Requêtes ordinaires de son hostel, présent".

"Sachent tous présens et advenir que le dixiesme jour d'octobre mil six cens trente et deux après midy en la cour royal du Mans devant nous Jacques Touschard notaire à ladicte cour demeurant à Connerray furent présents et establis chacunement de Jean Pans procureur scindicq, [suit une série de noms d'habitants de Connerré] tous paroissiens manans et habitans de la ville et enclos de Connerrai et faisans la plus grande et saine partie des habitans dudict enclos assemblés pour passer ces présentes au lieu où se font les assemblées ordinaires à issue de vespres d'une part, de Jacques Lebajeux et Pierre Joly et sa femme de luy auctorisée pour l'effet des présentes demeurant audict Connerré d'autre part, soubzmetant auxdits leurs hoires et pour cause en biens présents et advenir au pouvoir ressort et juridiction de ladicte cour, lesquels ont faict le bail qui ensuit, c'est à scavoir que lesdicts habitans de la ville et enclos dudict Connerray ont au jour dhuy faict bail à rente et par ces présentes baillent à rente annuelle et perpétuelle à commencer du jour et feste de Toussaints prochain et durée à perpétuité, c'est ascavoir les deux tours avec la place d'icelles estant aux deux costés de la porte de ville dudict Connerré proche le gué de la motte dudit Connerré avec le cu .... [?] des environs desdictes tourelles qui en dépend, à charge néanmoins de laisser le chemin et passage libre au publicq, sans aucune réservation, sinon droict ausdicts habitans de pouvoir aller et entrer en temps de guerres et troubles soit de jour ou de nuit à touttes heures et occasions que besoin en sera armé à feu esdictes tourelles pour la conservation de la porte de ville, auquel effect lesdicts preneurs feront ouverture en temps de guerre des canonnières desdictes tourelles, à la charge aussi par lesdicts preneurs de bastir et constinuer dans dhuy en deux moy avec prochainement benant [?] tant sur lesdictes deux tours que sur les deux aislles de mur qui sont aux deux costés de ladicte porte, une cherpante pour couvrir ladicte porte en telle forme que bon luy semblera pour l'usaige de leur hébergement sans toutefois pouvoir empescher lesdicts habitans de faire apposer sur ladicte porte les branches nécessaires pour lever un pont ... [?] Il y en avoit un autrement [?] si besoin est et la liberté de lever ledict pont quand besoin en sera ; laquelle cherpente lesdicts preneurs feront couvrir dans le mesme temps de bon bardeau neuf et y feront monter une ou deux cheminées pour y faire du feu à peine de privation dudict bail sy bon semble ausdicts habitans et de touttes pertes despens, domaiges et interests faulte de satisfaire aux clauses et conditions de ladicte baillée dans ledict temps, pouront aussy lesdicts preneurs faire une ouverture de grandeur convenable pour faire une bouticque dans l'une desdictes deux ailles de mur et autres choses que lesdicts verront bon estal pour l'usaige du mestier de marchand pourveu qu'il n'inccommode lesdicts habitans audict temps de guerre à la deffense de ladicte porte et le publicq audit chemin et passaige. La baillée faicte par lesdicts bailleurs ausdicts preneurs pour et moyennant le prix et somme de six livres un sol tournois que lesdicts preneurs ont promis demeurer tenus et obligés [...]".