Par nostre courtz de Careil et d´Escoublac, la juridiction de l´une n´empeschant l´aultre et tendant à une mesme fin, o submission et prorogation de jurisdiction jurée par serment, présantz en leurs personnes devant nous, sire Yves Chellet l´esné, Jan Mahé, Grigoire Denyel, Mahé Legal, Jan Quelard, Guillaume Quellard, Nouel Demeuré (?), Pierre Lesaige, Jacques Aougstin, Thébaud Seignard, Allain Roux, Guillaume Nycol, Thomas Vinces, Pierre Brohouan, Nycollas Nicol, Nouel Hachet, Yves Chellet le jeune, Yves Legal l´esné, Nouel Chellet, Guillaume Legal, Jacques Péan et generallement tous et chacuns les habitans de la frairie de Careil estans congregez et assemblés a prier Dieur et ouir la saincte messe en la chapelle monsieur saint-Just, ont pleu et choysy pour leur procureur special, maistre Jacques Hachet, notaire royal de la court de Guerrande et procureur postullant en icelle, auquel l´un et chacun d´eux a donné et donne par la presente plain pouvoir, auctoritté et plainne puissance de mains, gérer, négotier et faire pour lesdictz frairiens touz ainssin et de la maniere en leurs absences que sy eux mesme estoint presens pour faire construire, relever et bastir de neuff ladicte chapelle monsieur Sainct-Just sittué en ladicte frarie de Careil, faire marché avecque des artisans, tirer des atrestz pour faire le masonaige de ladicte chapelle y meptre des massons pour meptre les pierres et atrestz en oeupvre a feur ou a journée comme bon semblera, audict Hachet achepter des poultres, soulliveaulx, chevrons, lattes, cloux, chevilles et ardoize et ou aultrement ; bailler le marché a des artissans comme bon luy semblera et au milleur qu´il voira estre raisonable sellon son jugement et advis en ceste affaire et de contraindre Grigoire Moisan le jeune au paiement des parcelles de deniers qu´il a peu et deu toucher des deniers qu´il debvoict emploier à la redification, construction et bastimens de ladicte chapelle suivant les rolles qui seront mips entre les mains dudict Hachet, faire ledict Moysan se purger par serment deciziff sur le corpus domini en l´eglise monsieur Saint-Aubin de Guerrande, combien de deniers a Dieu et aultres deniers provenans du revenu de ladice chapelle et l´argent qu´il a peu recepvoir de la vante qu´il a faicte des vieux bois de ladicte eglize en general de contraindre ledict Moysan par touttes les voyes que e droict a rendre touttes et telles sommes de deniers qu´il peult avoir touché des deniers qui ont estz esligez pour rebastir ladicte chapelle, faire appeler les recepveurs des rolles qui ont faict la recepte desdictz deniers, le [ ] passé affin d´estre advizaigé en justice devant ledict Moysan, et faire declaration quelz nombre de deniers ilz ont delivré audict Moysan et les contraindre a parachever de serrer et amasser le contenu de leurs rolles sy faict ne l´ont ou paier en leurs privez noms. Faire eslargir le fons et emplacementz du bastiment de ladicte chapelle de quatre ou cinq piedz ou aultrementz sur le mesme bastiment et telle largueur qu´elle est a present et que ledict Hachet voira estre bon, faire des taxes et rolles de luy mesmes sur lesdictz frairiens pour lever deniers affin de construire et bastir ladicte chapelle aultant qu´il en pourra faillir. Tenant compte une foy le moys par devant monsieur le senechal de Guerrande, à l´esgail desquelz rolles ledict procureur prandra six desdictz frairiens sellon sa faculté et puissance et mesme en cas qu´il eust défaillance de deniers parquoy le manevre chomeroict. Ledit procureur poura aussy contraindre six desdictz frairiens des plus aparans a son choix pour faire advance des deniers a quoy se pouroict monter ladicte taxe et liquidationde deniers suivant lesdictz rolles, choysir et eslargir l´un desdictz frairiens, aussy a son choix entre les mains duquel il meptra les deniers qui seront amassez pour en faire seure garde et les bailler et s´en descharger peu a peu comme ilz seront emploiés audict manevre. Et prandera acte vallable de telle parcelles de deniers qu´il baillera audit habitand de ladicte frarie qu´il choisyra a son option et pourra iceluy procureur contraindre lesdictz habitans a aller ung de chacune maison a l´assignation que leur donnera pour servir a la perrière, a porter de la terre franche, servir les massons audit manevre et faire ce qu´il sera necessaire a ladicte chapelle et à faulte ausdictz habitans de ce faire et sur le refus, ledict procureur les fera executer de chacun dix soubs tournois et generallement tout ce que sera par ledict Hachet faict et procuré en leurs noms. Ilz ont l´un et chacun d´eulz promis et juré par leursdictz sermentz l´avoir stalbe et pour agréable, dict en leurs présences ou absences, eux appelez au nom renonczans a jamais en faire aulcune revocation quelzconques. Et pour ce que lesdictz habittans l´ont ainsy voulleu, grée, accepté, consanty, promis et juré par leursdictz sermentz tenir et accomplir et non y contrevenir, nous notaires soubzcript avons de leurs consantemans et requestes, jugés et condampnez, jugeons et condampnons par nous et les jugements de nostredicte courtz soubz le seel de l´une d´icelle.

Faict et gréé en ladicte chapelle Sainct Just, le dixiesme jour de juillet l´an mil cinq centz quatre vingtz quatorze au matin, soubz le signe dudict Chelez ; et pour ce que les aultres habitans ne scavent signer, ont prié myssire Mathurin Dutay, pbre servant a ladite chapelle, de signer ce qu´il a faict à leurs requestes, lesdictz jour et an.

Ainsy signé : Y. Chellet, M. Dutay, Y. Simon, notaire, J. L. Roulx, notaire.